13.01.2012

Со песни и ора, покрај василичарските огнови, вечерва се прославува двојниот празник – Св. Василиј Велики и дочекот на Стара, односно Православна Нова Година.

На повеќе од 20 локации во градот Демир Хисар и скоро во секое друго населено место, вечерва се палат василичарските огнови, се пие топла ракија, се печат колбаси  и се вртат мазници.

Василица не е само црковен празник, туку и еден од највеселите празници што го слават православните христијани. Утрото на 14 – ти јануари, на вратите ќе затропаат василичарските коледари со песни за среќна и бериќетна година.

Со празникот Василица се поврзуваат многу народни обичаи. Еден од најтрадиционалните во демирхисарско  е подготвувањето на мазници со паричка. Според  народното верување, на оној што ќе му се падне паричето, во  текот на годината ќе го служи многу среќа и успех.

Дел од многубројните василичарски огнови,  традиционално  вечерва ќе посети  градоначалникот Тони Ангелевски со желба  на своите сограѓани лично да им ги честита празниците.