10.02.2012

ДЕМИР ХИСАР УСПЕШНО СЕ СПРАВУВА СО СНЕГОТ

Иако Демир Хисар вообичаено е едно од „најснежните“  и најстудените подрачја во РМ, последниве години наназад многу  успешно се справува со снегот и екстремното студенило.

Најтешкиот „испит“ се годинашниве обилни и катадневни снежни врнежи. Речиси да нема ден да не падне нов снег, а при тоа да не ги дооснежи градот, селата, а посебно оние на повисоките места. Но благодарение на навремените продговотки пред почетокот на зимската сезона во смисла на обезбедување доволно финансиски средства и исправна механизација, досега не се случи, заради високиот снег,  некое населено место да остане отсечено.

Градскиот „Комуналец“ вклучи 3 возила опремени со снежни плугови, а зависно од потребите и висината на снежната покривка, дополнително ангажира механизација од други приватни компании. Засега, како што велат во „Комуналец“, најголем „проблем“ е нетрпеливоста на граѓаните кои речиси едновремено сакаат и бараат  чистење на патиштата до нивните населени места, без при тоа да имаат предвид дека  расчистувањето се одвива според утврдени приоритети од страна на „Комуналец“ и локалната самоуправа. Средствата обезбедени за чистење снег за оваа година се при крај, но доколку се укаже потреба, општината ќе обезбеди дополнителни, вели градоначалникот на општината Тони Ангелевски

Во моментов снегот е расчистен на сите локални патни правци во општината во должина од 76 км и 10 километри улици во градот. Исто така проодни се и регионалните патишта до, од и низ Демир Хисар во должина од 62 километри. Единствено се уште не е прооден локалниот пат до селото Радово каде што живеат 13 жители, од кои 4 малолетни деца.  Раководителот на регионалниот општински центар за управување со кризи, Љубе Николовски информира, дека со Радовци се во постојан контакт и зависно од нивните потреби, општината и Центарот соодветно ќе интервенираат. Инаку патот до Радово остана неисчистен бидејќи за оваа делница потребна е потешка механизација која што, нити „Комуналец,“ нити пак некоја друга фирма во општината ја поседува.

Малку понезавидна е состојбата со градските улици и тротоари каде што заради паркираните возила и набиениот и замрзнат снег од преходните врнежи, на коловозите се уште има снежна покривка.